Özəl

Daha çox məqalə oxu

More
  • Baxış sayı 201

”Vətənə xidmət üçün də rüşvət vermək lazımdır?”

”Sabah Vətən deyəndə ki, dardayam, mən də deyəcəm istirahətdəyəm”

Silahlı Qüvvələrin Təlim və Tədris Mərkəzinin (TTM) qarşısında martın 6-da gizir olmaq üçün imtahandan keçənlər toplaşıblar. Ancaq imtahanlardan və idman normativlərindən keçənlərin bir çoxu gizir hazırlıq kursuna qatıla bilməyiblər.

Kursa qatıla bilməyənlər yeniçag.az-ın reportyorlarına deyiblər ki, səbəbi rüşvətdə görürlər.

Məlumata görə, 100-ə yaxın gizir olmaq istəyən və onların valideynləri Müdafiə Nazirliyinin qaynar xəttinə zəng ediblər və TTM-in rəisini görüşə səsləyiblər. Ancaq onların qarşısına heç kim çıxmayıb.

Gizir olmaq üçün imtahanlardan keçən Əhmədov Mirzə bildirir ki, bütün imtahanlardan uğurla keçsə də, onu işə götürməyiblər:

“27 yaşım var. İdmanda qoyulan bütün normaları artıqlaması ilə yerinə yetirmişəm. Ancaq məlum olur ki, məni işə götürməyiblər. Pulum olsa, götürərdilər. Keçənlərdən hansını dindirdim, hamısı dedi ki, hesabım çatıb, keçəcəm. Ona görə də, onlar imtahanlarda, idman normativlərində kefləri ilə hərəkət edirdilər. Burada duran yüzdən çox uşağın 5-i yalan desin, onu yalan desin, bu qədər uşağın hamısı yalan danışır? Ölkə rəhbərliyinin bu məsələdən xəbəri yoxdur. Əgər xəbəri olsa, buradakı zabitləri cəzalandırar”.

Murad Alıyev ikinci dəfədir gizirlik kursuna qatılmaq üçün gəldiyini bildirib. O, gizir olmaq üçün 5-7 min manat rüşvət istənildiyini iddia edib:

“İxtisasa uyğun olaraq pul verilir. Aviasiyada ən bahalısı gizir olmaqdır. Onun üçün 7 min manat verilməlidir. Mənim yanımda test yazmayan, idmanda normativ yerinə yetirə bilməyənlər keçdi, zülm çəkən bizlər qaldıq ortalıqda”.

etiraz edənlər

etiraz edənlər

Mənbə: foto yenicaq.az

İddia olunur ki, gizir olmaq üçün qiymət 4 min manatdan başlayır.

Dördüncü dəfədir oxşar vəziyyətlə üzləşən Güləsən Quluzadə də deyir ki, rüşvət vermədiyi üçün kənarda qalıb:

“Biri var idi, kostyumda gəlmişdi normativə. Deyirəm, niyə normativ vermirsən? Cavab verdi ki, nəyimə lazımdır, pulumu vermişəm. Biz haqqımızı tələb edirik, bizim üzərimizə polis çağırdılar. Deyirlər ki, sakit durmasanız, içəri salacağıq sizi. Biz vətənə xidmət etmək üçün gəlmişik. Bu ölkədə vətənə xidmət üçün də rüşvət vermək lazımdır? Sabah müharibə başlasa, kim gedib öləcək? Biz kasıblar. Onda niyə haqqımızı yeyirlər?”.

Nurlan Abdullayev isə deyib ki, imtahanı yüksək səviyyədə versə də, gizirlik kursuna qatıla bilməyənlərdəndir:

“Gizir olmaq üçün bizdən 4-5 min pul tələb olunur” – Hərbçilər etiraz edir

Mənbə: Yenicag.az

“Məncə, rüşvət vermədiyim üçün kənarda qaldım”

Vüqar Quliyev də kursa qatıla bilməməsindən şikayət etdiyi üçün TTM-in qarşısına gələnlərdəndir. Atası Ayət Quliyev bildirib ki, oğlu polisdə xidmət etdiyi halda ordu sıralarına qatılmaq üçün işdən öz ərizəsi ilə çıxıb:

“Oğlum Dövlət Sərhəd Qoşunlarının çevik alayında hərbi xidmət keçib. Əsgərlikdən gələndən sonra polis sıralarına qatılıb. Mənə dedi ki, Milli Orduda xidmət etmək istəyirəm. Ona görə də ərizə yazdı, öz istəyi ilə polisdən çıxdı. Pulum olmadığı üçün oğlum gizirlik kursuna qatıla bilmədi”.

O deyib ki, ilk rüşvət poliklinikadan başlayır.

“Müdafiə Nazirliyinin Mərkəzi Hərbi Poliklinikasının rəisi tibb xidməti polkovnik-leytenantı Mehriban Quliyeva pulsuz heç bir sənədə imza atmır. Uşaqlar burada haqlarını tələb edir, hərbçilər onların üstünə polis çağırıb. Ayıb deyil? Polis haqqını tələb edənlərə deyir ki, aparacağıq içəri sizi, təxribat törədirsiniz. Təxribatı törədənlər içəridə pul alanlardır, polisi göndəriblər kasıbın üzərinə. Sabah Vətən deyəndə ki, dardayam, övladını göndər, mən də deyəcəm istirahətdəyəm. Övladım gedib düşmənlə üzbəüz xidmət aparıb gəlib, yenidən düşmən qarşısına getmək istəyir, pul istəyirlər. Bunu kimsə izah edə bilər?”.

etiraz edənlər

etiraz edənlər

Mənbə: foto yenicaq.az

Ayət Quliyevin oğlu Vüqar Quliyev atasının sözünə qüvvət verərək deyib ki, bütün imtahanları yüksək səviyyədə verib:

“Gözümün qabağında sıfır qiymət alanları keçirdilər, imtahanlarda yüksək nəticə göstərənləri kənarda saxladılar. Biz kursa keçənlərlə birlikdə yenidən imtahan tələb edirik. Ədaləti olanlar gəlib imtahanlara baxsın, o dəqiqə görəcəklər ki, biz buraya yalan yerə yığışmamışıq. Keçən şəxslərin özləri dedi ki, pul veriblər. İxtisas olaraq kəşfiyyatı seçmişdim. Gözümün önünə ölümü aldığım halda, məndən pul tələb edirlər. Sabah bu Vətəni pul verənlər müdafiə edəcək? Onlar maaş almaq üçün hərbiyə gedənlərdir”.

Orxan Əhədov bildirib ki, poliklinikada ondan 500 manat pul alıblar:

“Mənə orada dedilər ki, 500 manat verməsən, xəstəlik yazacağıq, imtahanlara girə bilməyəcəksən. Mən də məcbur 500 manat pul verdim. Mənim atam 3 min manat pul vermişdi. Məni də kənarda saxladılar”.

2016-cı il 2-5 aprel döyüşlərinin iştirakçısı olan və əməliyyatlarda yaralanan Ədalət Abbasov bildirib ki, ailənin tək oğludur:

“Aprel döyüşlərində Lələtəpə uğrunda döyüşmüşəm. Qulağımdan yaralanmışdım. Yaralıları, şəhidləri ərazidən çıxarmışam. İmtahan vermişəm, hamısından uğurla keçmişəm, ancaq pulum yoxdur deyə, kənarda qalmışam”.

TTM-in qarşısında dayanan şəxslər bildirib ki, imtahanlardan öncə Azərbaycan müdafiə nazirinin şəxsi heyət üzrə müavini – Şəxsi Heyət Baş İdarəsinin rəisi general-leytenant Kərim Vəliyev, Təlim və Tədris Mərkəzinin rəisi general-mayor Gəray Bağırov onlara imtahanların, seçimlərin ədalətli olacağını deyiblər. Ancaq bu gün dedikləri sözün üstündə durmurlar.

Seçimlərdən narazı qalanlar Müdafiə Nazirliyinin qarşısına gediblər. Nazirlikdə onları qəbul etməyib, Zabitlər evinə göndəriblər. Orada isə bildiriblər ki, izahat yazın, 15 gün sonra cavab deyəcəyik.(meydan.tv)

Bu yazını paylaş

Nazirlər Kabineti: Azərbaycanda yoxsulluq səviyyəsi 5,1 faizdir

Next Story »

Söyüşə görə həbs olunan AXCP üzvləri onlara şər atıldığını söyləyiblər

Məqaləyə şərh yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

This site uses Akismet to reduce spam. Learn how your comment data is processed.